مكان غريب

6 01 2008
  1. مكان غريب

____________________________________

بعد ربع ساعة كنت قد قمت فيها بتغيير ملابسى و تصفيف شعرى الطويل ، و ها أنا أقف فى تلك الردهة الواسعة الطويلة التى يظهر فى جدارنها أكثر من عشرين باب مكتوب على كل منهم لوحة صغيرة برقم الباب , كانت تلك الردهة مزدحمة بالناس و كانوا يرتدون نفس تلك البذلة السوداء و التى أستنتجت بأنها الذى الرسمى فى هذا المكان

مررت على بعض البنات أعمارهم تظهر تقارب و كانوا يتحدثون عن حادثة ما أثناء تدريب أحدهم , أكملت طريقى أبحث عن تلك الحجرة (ج60) و انا أنظر لكل باب , و هاهو يخرج أحد الأشخاص فى نفس عمرى تقريبآ و يغلق الباب وراؤه ثم أخترق الباب ذلك الطيف الضوئى الذى تبينت بعدها أنه على شكل ولد يمشى وراء صديقه فى جمود

توقفت لبرهة مذهولآ لذلك المنظر ثم تابعت طريقى بين تلك الحجرات حتى وصلت لها فى آخر الردهة مكتوب عليها (ج60) و كان يقف أمامها ذلك الشاب (علاء)

ألتفت علاء بعد أن رآنى و أمسك بيد بالباب ليديرها ثم يقول :

علاء

انفتح الباب و دخل علاء و دخلت وراؤه بعد ان أشار إلى بالدخول

لأرى أعجب شىء

كنت أتوقع أن أجد مكتب ما أو بعض اللوحات معلقة على الحائط هنا و هناك و لكن ما رأيته كان فوق عقلى

وكأننا دخلنا لحديقة مليئة بالزهور و العشب الأخضر و الشمس ترسل أشعتها على كل شىء

تقدم علاء فى الممر الوحيد المحاط بالأشجار و الورود , تتبعته لنجد فى نهايته كرسى من تلك الكراسى الموجودة دائمآ فى الحدائق يجلس عليه شخص ببذلة سوداء تظهر عليه الهيبة بتلك النظارة الأنيقة و الشعر الأبيض و اللحية القصيرة المهذبة بإنتظام

حياه علاء بإحترام و تركنى معه ليرجع من نفس الطريق

أشار لى ذلك الرجل بالجلوس فجلست بجانبه أشعر بالهيبة من النظر له

قال لى بصوت خافت :

أهلا يا زين , إيه اللى انت عملته ده مع الدكتور فى كليتك ده ؟

أنا آسف أنا ما كنتش أعرف ان العقاب ممكن يكون بالنفى من البلد كده

لأ يا زين انت مش بره البلد و لا حاجة انت لسه فى مصر

يعنى انا فين بالظبط و انا هنا من أمته ؟

ما تتسرعش انا هافهمك كل حاجة بس ركز معايا, أولآ انا أسمى دكتور محسن , مدير المدرسة اللى أحنا قاعدين فيها دلوقت

ثم رفع إصبعه فى الهواء ليتكون عليه عصفور أصفر جميل من الهواء ظل ينتقل على إصبعه فى رشاقة ثم أكمل الدكتور حديثه :

بص يا زين لازم تعرف انك مختلف عن الناس العادية , و ده بيحتاج معاملة خاصة هانقدر نوفرهالك هنا فى المكان ده

بص انا هافهمك من الأول ,

و أمسك بكفى و فتحها ليقفز إليها العصفور فى خفة

كل شخص بيتولد بيكون عنده قوة خاصة تقدر تقول طفرة جينية مش موجودة فى أصله الشخص ده لما بيكبر بتتوقف إنطلاقه لقوته على عامل واحد , لو أثناء ولادته أنفجر النجم الموجود فوق موقعه على الأرض يقدر الشخص ده إطلاق طاقته و السيطرة عليها أما لو ماحصلش الكلام ده هايبقى شخص طبيعى زى أى واحد

ثم أطبق الدكتور يدى على العصفور بقوة حتى شعرت بإنكسار العصفور بين يدى

بعد إكتشاف السر ده قرر القادة عدم نشره و جعله سر كما هو و تم إنشاء وزارة فى كل دولة على مستوى العالم ملحق بكل وزارة مدرسة و مركز للأرصاد بيتم رصد أى ولادة لطفل مختلف جديد و متابعة حالته و بعد ما يتم ظهور طاقته بيتم إدخاله للمدرسة و تدريبه على السيطرة عليها و إستخدامها فى الخير , مده التدريب 3 سنوات بيتم عمل مجموعة من الأختبارات كل سنة للتأكد من صلاحية الفرد للإنتقال للمستوى الجديد , المدرسة و الوزارة ماحدش يعرف عنها حاجة إلا رئيس مجلس الوزراء و رئيس الجمهورية بس تقدر تقول إنها من الأسرار العسكرية لأن بعض المختلفين بيتم تجنيدهم للعمل فى المخابرات أو بعض فرق الخاصة فى الجيش أو فى فريق الطوارئ الخاص بالمدرسة

أفلت الدكتور يدى ففتحت يدى لأتفحص العصفور المسكين و لكنى حينما فتحتها لم أجده فى يدى و كأنه إختفى

و أكمل الدكتور محسن حديثه و هو يظهر جدية بالغة

يوجد قانون خاص بالمختلفين بيتم تطبيقه على كل شخص تبدأ طاقته فى الأنطلاق

القانون الأساسى هو انه بيتم محو جميع بيانات الشخص من الحياة العامة و إضافته لسجلات المختلفين و محو ذاكرة أى شخص يعرفه

و هنا أنتبهت له بشدة و أنفجرت قائلآ:

تقصد ان أهلى دلوقتى مايقدروش يتعرفوا عليا

نظر لى بحدة :

لأ القانون هو القانون و انت بالذات يجب محو ذاكرة أى واحد يعرفك لحمايتك .. زين .. انت الوحيد فى المدرسة اللى انفجر له نجمين , تقدر تقول انك حالة خاصة …. و ده معناه انك تقدر تتحكم فى قوتين و دى حاجة ماحصلتش من حوالى 50 سنة أو أكتر العلماء اللى درسوا جسمك و انت مغمى عليك قالوا ان القوة هى الطاقة الكهربية اللى بتتولد من جسمك بشراهة و الطاقة المغناطيسية الناتجة عنها* أما القوة الثانية فلا يجب على أن أعرفك بها إلا بعد تخرجك من المدرسة و .. صدقنى هذا أفضل لك , نرجع للمدرسة : المدرسة هنا كان إسمك فيها من أول ولادتك و كان مكانك محفوظ , كل طفل له قدرات خاصة فى مصر بيجى فى المدرسة هنا بيكون له حجرة لوحده فيها كل اللى بيحتاجه و بينضم كل طالب لمدرب من المدربين

طبعآ فى أنشطة رياضية و مسابقات غير كده ممكن أى حد يقدم إقتراح لى أنا شخصيآ بأى فكرة جديدة

ثم توقف قليلآ ليلتقط أنفاسه ببطء و أردف قائلآ :

عندك أى سؤال ؟

نظرت له بعينين شاردتين و انا أفكر فى والدى ووالدتى اللذان لن أقابلهما بعد الآن أبدآ أبدآ ..

***************

تحول المكان من حولنا إلى حوائط بيضاء و تحول الكرسى الكبير المصنوع من الخشب الذى كنا نجلس عليه إلى كرسى جلد أسود جميل ناعم الملمس و ظهر مكتب إلى يميننا و مكتبة صغيرة تحوى بعض الكتب أمامنا و ظهر الباب على اليسار و كان على مقربة مترين أو أقل

نظرت له فى أستغراب و لكنه تجاهل نظراتى تمامآ كأن ما حدث طبيعى جدآ ثم قام و جلس إلى الكرسى الموجود خلف مكتبه , تتبعته لأجلس على أحد الكرسيين الموجدين أمام مكتبه

أنحنى د/محسن على مكتبه كأنه سينقض على و رفع عويناته على أنفه و هو يقول ببطء :

و دلوقتى هاتشوف مفاجأة صغيرة كننا محضرنهالك

و بعد ثانية واحدة كان هناك من فتح الباب بعد أن أذن له الدكتور بالدخول و كانت مفاجأة مذهلة حينما رأيت أفضل أصدقائى رامى يدخل علينا المكتب و هو يظهر بعض القلق و يرسم أبتسامة بصعوبة على وجهه يحاول إخفاء توتره بها

أشار له الدكتور بالجلوس

جلس رامى و هو ينظر لى مبتسمآ

أكمل الدكتور كلامه :

ها إيه رأيك فى المفاجأة دى , رامى صاحبك هو اللى كان بيقدر يمسح كل أخطائك الغير مقصوده , رامى موهبته قراءة و كتابة الذاكرة لأى شخص و لحسن الحظ انه كان موجود و إلا كنت انكشفت من زمان

رامى ظهرت عنده القوة قبلك ب3 شهور تقريبآ و بعد ما أخد تدريب لمدة شهر رجعناه علشان يراقبك و يساعدك و هو اللى بلغنا لما عرف ان طاقتك أكتمل انطلاقها

نظرت لدكتور محسن بحزن و انا أقول ببطء:

طيب و الناس اللى شافونى و انا بضرب الدكتور عملتوا معاهم إيه ؟

رد الدكتور بعد أن إبتسم :

ما تقلقش علاء و رامى عملوا الواجب و زيادة , ودلوقتى .. اتفضل انت مع رامى أكيد عندكوا كلام كتير عايزين تقولوه لبعض و كمان فى حاجات كتير عايزين تعرفوها لو محتاجين حاجة ممكن تطلبوها من علاء المشرف بتاعكوا

ثم أشار لنا بالإنصراف

فقمت أنا ورامى لنخرج من المكتب بعد ان شعرت بالحزن لذلك الذى حدث لوالدى …. و كأنى أصبحت يتيمآ فجأة ..

________________

الهامش:

  1. حقيقة : كل جسم تسرى فيه طاقة كهربية يتولد حوله مجال مغناطيسى يتناسب طرديآ مع قوة التيار الكهربى


الإجراءات

Information

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s




%d مدونون معجبون بهذه: