Ziko

30 12 2007





انقل لينكس ليه انا مالى ؟

16 12 2007

فى الحقيقة انت ولدت عبد كالآخرين , عبد للآلات , وليسيطروا عليك سجنوك فى سجن لا تستطيح ان تراه او تلمسه او تشعر به , سجين فى عقلك,

كانت هذة احدى الجمل فى فيلم ماتريكس و انا شخصيآ أرى انها تحققت بحذافيرها من طقطق ل سلاموا عليكوا . انت كبرت لاقيت الكمبيوتر بتاعك شغال بويندوز و ماتعرفش إلا ان الكمبيوتر لازم علشان يشتغل إلا انك تنزل ويندوز و المصيبة بقى انه بيذلك كل شويه يفرقع منك و يطرشق من جنابه )طبعآ بسبب اللى بتعمله فيه ( و يقولك نزلنى تانى و انت طبعآ تجيب الأسطوانة اليتيمة بتاعته و تقعد تفرمت و تنزله و بعدين تنزل المشغلات بتاعت الشاشة و الكروت و تعرف النت و تنزل كل البرامج و يا سلام بقى لو فى لعبة كنت مخلصها طبعآ راحت عليك كل تسييفاتها و لذلك

)بمناسبة طلوع عنيكم نقدم لكم البطل المغوار ( لينكس

و لاتقوللى بقى ويندوز وقع و البرنامج مش شغال و لا الجهاز هنج و لا واحد عنده 3 سنين اخترق جهازى امبارح ببرنامج اهطل .

كل اللى اتعلمته و عرفته من مشاكل لويندوز انساها خالص . كل اللى عليك تحدد انت عايز تعمل ايه على الجهاز بالظبط .. جرافيك .. برمجة .. تصميم مواقع حسابات كتابة و أختار التوزيعة المناسبة ليك و اللى هتلاقى ان فيها كل اللى حلمت و هاتحلم بيه

—————

التوزيعة : نسخة من قلب النظامتم أختيار هدف لها و إضافة البرامج و الأدوات المناسبة للهدف مع أضافة البرامج التى لاتخدم الهدف كبرامج تكميلية

————–

و لا تقوللى هانزل البرامج بعد ما أنزل النظام و أقعد يومين أظبط فى الجهاز و لا حاجة من دى كل البرامج اللى انت محتاجهاو اللى مش محتاجها هاتلاقيها على الأسطوانات بتاعة التوزيعة مثلآ توزيعة سوزى الأخيرة 10.3 عبارة عن 7 اسطوانات عليها كل حاجة و فى بعض التوزيعات بتوصل ل 15 اسطوانة زى ديبيان

أى برنامج شغال بيه على ويندوز هتلاقى له اكتر من بديل على لينكس و حتى لو مش مريحاك البرامج دى و اتعودت على برامج ويندوز ممكنتشغل البرنامج اللى انت عاوزه على لينكس عن طريق برامج محاكاة زى كروس اوفر أو واين

—————–

برامج المحاكاة : برامج تقوم بالتوصيل بين البرنامج المخصص لنظام معين و النظام الحالى الغير متوافق معه فى الأساس عن طريق تبديل أسماء الدوال المطلوبة أو إمداده المكتبات المطلوبة

—————–

أهم حاجة فى الحكاية كلها هى البرمجة .. احنا بعيد عنكم و عن السامعين هانطلع مبرمجين يعنى محتاجين نشتغل فى

1- بيئة مناسبة فيها مكتبات كود مفتوحة تستخدمها زى ما انت عايز

2- برامج جاهزة تطورها على سبيل قتل الوقت

3- برامج سهلة و سريعة تشرح بيها البرنامج بتاعك

4- كمان اتصال آمن مع الأنترنت

و كل ده موجود فى ويندوز ماعدا أول و تانى و تالت و رابع نقطة يعنى لو أشتغلت على ويندوز برمجة هاتضيع .. ولا هتلاقى مكتبات و لا برامج مفتوحة و لا برامج سهلة و لا أتصال آمن يعنى هاتبقى فى الضياع

عرفت بقى دلوقت ليه انت كمبرمج المفروض تفرمت السى و تنزل لينكس .. طيب سلام!