بلد ورق

24 09 2007


يطلع الوزير من دول فى التليفزيون و يقول : كل شىء تمام فى صعوبات بس بنحلها و كله حسب توجيهات سيادة الريس , طبعآ بعد مايخلص كلام و يقول الرقمين اللى حافظهم تحس ان الدنيا بخيبر و ربيع و الجو بديع و تقفل على كل المواضيع , انا كنت من الناس دى حتى اصطدمت لأول مرة مع الواقع المرير اللى طلع بعيد خالص عن كل اللى بيقولوه عن التقدم و زوال البيروقراطية و عن سرعة الإتصالات و سرعة التعامل بين الوزارات .

الحكاية كانت بسيطة , كنت فى كليه هندسة ببورسعيد و انتوا عارفين و السادة المشاهدين طبعآ عارفين ان كل والد ووالدة عايزين يشوفوا ابنهم مهندس و بنتهم (داكتورة) لكن الواد مش عايز كده الولد عايز يدرس برمجة و علوم حاسب بس هما لازم يمشوا رأيهم

أدخل كلية هندسة و أقول طيب نخش قسم حاسبات أهو ينوبنا من الحب جانب , اطلع فى نهاية سنة أعدادى بمادتين و أدخل قسم إنتاج أقول وماله أكمل فى القسم ده و بعدين آخد كورسات فى الحاسب بعدين و أشتغل بالشهادتين .

أروح ألاقى 3/4 القسم نايم من السنة اللى فاتت و فى ناس عايدة مرتين (External) أقول تفائل مش يمكن هما وحشين و انت اللى حلو ؟ أكمل و احضر و أذاكر و فى الآخر أطلع ب5 مواد حتى مادة الرسم اللى انا أساسآ موهوب فيها لأنى أساسآ برسم رسم تصويرى و كاريكاتورى يطلعلى فيها معيد مابيعجبوش العجب .

طيب أحول بقى كلية تانية كلية إيه ؟ أسم الله عليك كلية حاسبات و معلومات ..و للعلم مافيش كلية حاسبات و معلومات فى بورسعيد أقرب واحدة فى أسماعيلية

تلاقينى رايح نادى الجامعة لمكتب التحويلات دافع ال35 جنية و مالى الإستمارة و انا بسلمها أخدو الصورة و أدانى الأصل و طلب 1.5 جنية دمغة , طيب ماشى آخد الطلب و أخلصه من شئون الطلبة فى الكلية الله مش لازم يمضوا عليه .

تانى يوم أروح إسماعيلية و أقدم الطلب و أدفع 35 جنية تانيين و أملى طلب تانى و الموظفة تمضيه تانى بعدين تيجى تقول فوت علينا بعدين عشان لسه هايتمضى عليه .. إمضاء تانى ؟ ماشى ! أجى بعد أسبوع الورق بتاعك فى المكتب التانى أروح المكتب التانى تقولك الورق لسه ما إتمضاش عليه فوت كمان أسبوع

أروح أسأل فى المدينة الجامعية فى نهاية الجامعة – ماتتصورش الشارع طويل و شمس هناك إزاى كأنك رايح تحارب و ياعينى على الذباب (كلاب بلدى طائرة) – يقولك و الذكاء بيشر من عينيه ! إنت تحويل داخلى ؟ أقوله آه , يقولى ليك مدينة طيب أروح أجيب مظروف ألاقيه ب50 جنيه – مش مشكلة –

روحت مليت الورق و الضامن و صورتها و اتصورت مع العلم اننى بتصور كل 4 سنين مرة و خلصت كل حاجة لسه خانات شئون الطلبة و الكشف الطبى طيب أروح أكملهم تلاقى شئون الطلبة تقولك لسه التحويلات لم تقبل أستنى لما تيجى الموافقة .. إستنى إن الله مع الصابرين .

آجى بعد أسبوع , هاه الطلب اتمضى ؟ تقولك لسه العميد مش راضى يمضى ! طيب يعنى اترفض و لا إيه تقولك لآ هو بيمضى متأخر , يعنى إيه مش فاهم الدراسة الأسبوع الجاى و طلب التحويل مش ممضى يعنى ولا إتمضى و لا إترفض
بعد ما رأت الموظفة تعبنا و رايحين جايين قالت هات رقم تليفونك (قال يعنى هاتتصل بيا لو أتوافق عليه )و خد رقم تليفون المكتب , ماشى !

بعد يومين اتصل الرقم بيرن بترفع السماعة .. لو سمحتى عايز اسأل على التحويلات ؟ ثانية واحدة .. صوت وضع السماعة تعرفى يا فتحية ان الخضار غلى .. لأ .. آه و الله .. و الراجل جوزى مش ؤرلامنليبل…. يا مداااااااام
ولا حياة لمن تنادى خلصت المكالمة بعد عذاب و دفعت 7 جنية من غير ماقول غير جملة واحدة (ممكن اسأل على التحويلات) طيب نسافر أول الدراسة بقى

أروح تانى يوم تقولك الورق اتمضى و راح الكلية طيب نخلص ورق المدينة بقى قبل ما يوم التقديم يفوت
ملحوظة : آخر يوم لتقديم مظروف المدينة 31 /8 و الطلب أتمضى 11-9
ملحوظة تانية : كان معاها رقم التليفون و ماكلفتش خاطرها ترن حتى طيب أخدته ليه

أروح الكلية يقول مش هاقدر أكملك الورق لازم الملف بتاعك يكون عندنا طيب هاييجى أمتى , مش عارف انا هابعت الطلب و هما يبعتوه لما القيامة تقوم ان شاء الله , طيب ممكن نسرع العملية دى , ينظر قى ذكاء ! طبعآ ممكن تاخد الطلب و توديه لهندسة و تجيب ملفك بنفسك , طيب حلو هات الطلب , آهه جنبى أستنى يتمضى و يتختم (يتمضى عاشر) طيب لسة كتير , لآ .

أستنى ساعتين لحد ما جاء الموظف من عند العميد و قام بتصوير ( الورقة ) و قاللى وديها شئون الطلبة فى هندسة و هما هايدوك الطلب على طول

أروح هندسة تانى يوم يقوللى أعمل إخلاك طرف و يدينى ورقة فيها عشرميت إسم مفروض يمضوا حتى المدينة الجامعية اللى لا ناقة لى فيها و لا جمل عملت منها إخلاء طرف و إستنيت موظف العهدة و المعاون (إتنين فى واحد) ساعة و نص بالظبط و مضى أمضتين ( مش بقولك إتنين فى واحد )

أرجع شئون الطلبة يقولى مضى أمينة الكلية , اطلع ألاقيها و لله الحمد على مكتبها و هى الوحيدة فعلآ اللى حسستنى بأنها جديرة بالإحترام فعلآ , و قامت بالإمضاء و هى تسألنى ليه عايز تحول كليتنا حلوة ؟
يعنى أرد أقول إإإإإإإإإإإإإإإإإإإإإإإإيه.

طيب انزل تانى يقوللى 1.5 جنية دمغة .. ماشى ! و يدينى الملف و يقول مضى السيد و كيل الكلية لشئون التعليم و الطلبة .. طيب اطلعله فى الدور الأول يقولوا فى المكتب التانى أروح التانى تقول فى المكتب اللى قبل الأولانى أروح له تقوللى فى الآخرانى أرجع للأول تقول عنده إجتماع فى التانى أرح التانى تانى تقول بيصلى فى مكتبه , طيب أستنى نص ساعة لحد ما خلص و مضى و نزلت عاشر لشئون الطلبة يقوللى أنا آسف مش هاقدر أديلك ملفك أصله مش مختوم , انظر للورقة اللى جايبها من إسماعيلية و اللى قعدت ساعتين علشان تيجى ألاقيها مش مختومة (للأسف البغيض ) طيب أبوس إيدك عايز أخلص ورق المدينة يقوللى طيب خد صورة من الورقة الأخيرة اللى مضيت عليها الراجل اللى كان بيصلى و روح بيها هناك هما هايقوموا بالواجب و يخلصوا الورق كله !

أروح الحاسبات ألاقى الراجل بيقول انه بعت الطلب الأصلى , رحت مطلعله الورقة السحرية اللى هاتحللى كل مشاكلى يبص فى الورقة ويقول انا آسف مش هاقدر أخلص الورق بتاعك إلا لما الملف يجى , طيب إيه فايدة الورقة دى , ولا حاجة , طبعآ لا البراكين ثارت و لا ماتت الزهور و لا عوت الذئاب فى كهوفها ولا حاجة كل اللى حصل انى خرجت أدعى على اللى كان السبب و أكتب المقال ده أول ما روحت البيت , صحيح بلد بتاعت شهادات صحيح

قديمآ قال أحدهم : لا شىء هو أسوأ ما يمكن ان يحدث لنا على الإطلاق .”ريتشارد باشو حو مايحدث بالفعل

Advertisements




بيل جيتس أبو ويندوز

22 09 2007


­­­الكثير منا ممن رضى عليهم الزمن يملكون جهاز كمبيوتر , يفتحونه فى العادة لتشغيل الأفلام أو الموسيقى أو الألعاب أو حتى لتصفح الإنترنت و لكن لم يتسائل أحدهم كيف تم ذلك .. كيف يتم عرض هذة الأفلام أو يترجم الملفات إلى صوت أو حتى كيف يتصل بأحدهم على بعد ألاف الأميال عن طريق الشات , فى الحقيقة أن جميع هذة الأشياء ترجع إلى نظام التشغيل و الذى لم يعد أحد يرى غير ويندوز فى هذا الشأن.

فى الحقيقة أن نظام التشغيل هو مجموعة برامج مدمجة فى حزمة واحدة تباع على إسطوانة أو أكثر و بدون هذه البرامج يكون الكمبيوتر مجموعة من الأسلاك و الأجهزة عديمة الفائدة أى أن كمبيوتر بدون نظام تشغيل تبله و تشرب ميته

فى الحقيقة أن نظام تشغيل ويندوز قد لمع فى مجال الأجهزة الشخصية يعنى اللى عندى و اللى عندك ده جهاز شخصى لأنه فى البداية سهل التنزيل على الجهاز و سهل الإستعمال لكلا المبتدئين و المحترفين و توجد أجهزة فرعية كثيرة تتوافق معه مثل الآي بود و الكاميرات الرقمية و الطابعات و غيرها..
بدأت نظم التشغيل فى شركة أى بى أم حينما أبتكرت نظام تشغيل يعتمد على الكتابة , تقوم بكتابة الأمر و يقوم الجهاز بتنفيذه و إعطائك النتيجة من خلال شاشة أو طابعة أو حفظها فى ملف .. فى هذة الأثناء كان هناك طالبان فى السنة الثانية لهما فى الكلية هما بيل جيتس و صديق له هندى الأصل قاما بكتابة نظام تشغيل خاص بهما و سمياه (دوس) و هى أختصار ل(نظام التشغيل المعتمد على القرص) حيث كان النظام يمكن حمله على قرص مرن صغير و يحتوى أيضآ على جميع ملفاتك المهمة و بذلك تكون حاملآ لجهاز الكمبيوتر الخاص بك فى جيبك, أنتبهت شركة آى بى أم لهما و تبنت نظامهما بالكامل و شجعتهما على تطويره و بعدها قام الطالبان بترك الدراسة و فتحا شركة صغيرة لبيع البرامج ..
فى هذه الأثناء كانت شركة أبيل ماكينتوش قد أبتكرت نظام مخلف كليآ يعتمد على الرسوميات للتعبير عن الملفات و المجلدات بعد أن كانت الشاشة لا تعرض سوى الحروف البيضاء على شاشة سوداء
أنتبهت شركة بيل جيتس (مايكروسوفت) لذلك و قامت بعمل شبه نظام تشغيل يسمى windows 3.11
يعتمد على النوافذ و يستخدم أداة تأشير الماوسلتحديد الأشياء على الشاشة و لكن عيبه هو إعتماده على الدوس,
وبعدها تم إبتكار نظام آخر أحدث ثورة فى عالم الحاسب و هو windows 95 و كان يعتمد كلية على واجهة المستخدم الرسومية , ربحت من خلال بيعه الشركة مليارات الدولارات , تملك الشركة الغرور و تسرعت فى إصدار نظام تشغيل مطور أكثر و سمى window98 ولكن النظام فشل فشلآ زريعآ بسبب عدم إستقراره فأصدرت الشركة نفس النظام بتعديلات جزرية لضمان الأستقرار و سمى window98 SE و هو أكثر الأنظمة إستقرارآ الآن , تعاقبت الأصدارات لنظام التشغيل windows و منها ME,2000,NT,XP, و تم مؤخرآ إصدار النظام فيستا بعد أن تشفت الشركة ريقناو قامت تسميته فى البداية لونجهورن أو القرن الطويل على إعتبار أنه سيطيح بمنافسيها و لكنه حتى الآن لم يحقق النجاح المتوقع له بسببب متطلباته العالية لمكونات الأجهزة ,
من الجدير بالذكر أن نظام ويندوز ليس مجانيآ و يعتبر نسخه جريمة يعاقب عليها القانون , و إذا كنت تريد الطريق القانونى لتنزيله وكان ضميرك واجعكيمكنك شراؤه من أحدى مولات الكمبيوتر فى القاهرة و يتراوح سعره حسب نوع الإصدارة التى تريدها مع العلم أن سعره قد يصل إلى ألفى جنيه مصرى يعنى بيل جيتس جمع ثروته منين “.
— ” المرة الجاية لو كان لينا عمر هانتكلم عن المنافسين لبيل جيتس و هانعرف المشكلة اللى بتواجهه و مطيرة النوم من عينيه “.





warcraft

18 09 2007





internet

18 09 2007





her eyes

18 09 2007





ga3losa

18 09 2007





FreeYourCreation3

18 09 2007